🌿🌿НАВРЎЗ МУБОРАК🌿🌿

Боғлардан таралар гўзал бир ифор,
Шафтоли, ўриклар гули бетакрор,
Халқим қутлуғ бўлсин яна бир баҳор,
Бу гўзал далалар ризқ, рўзга тўлсин,
Юртим Наврўз олам муборак бўлсин!

Дўстим ғуборни қўй, кўзингни бир оч,
Қара замин сочар ўзгача қувонч,
Яна айвонларга қайтди қалдирғоч,
Бу гўзал далалар ризқ-рўзга тўлсин,
Юртим Наврўз олам муборак бўлсин!

Кўкдан этак ёйган ҳур гўзал малак,
Атиргул ҳажрида булбуллар ҳалак,
Ёниб дошқозонда қайнар сумалак,
Бу гўзал далалар ризқ-рўзга тўлсин,
Юртим Наврўз олам муборак бўлсин!

Яна юрагимдан кетди ғуборим,
Қалбимни қамради гўзал изҳорим,
Хуш келдинг юртимга гўзал баҳорим,
Юртимнинг жамоли чарақлаб кулсин,
Дўстлар, Наврўз олам муборак бўлсин!

©Мактуба ШАЙДО